هيا بنا نبرمج

-       يعني ايه برمجة ؟ وليه هي مهمه ؟ وهو لازم يعني اتعلم برمجة ؟ طب البرمجة دي مهمة اوي يعني ف المستقبل؟

أسئلة كتير حوالين البرمجة تعالوا بينا واحده واحده نحاول نجاوب ع الاسئلة دي

خد نفس كبير ونقول .. بسم الله الرحمن الرحيم.

يعني ايه يرمجة ؟ 

البرمجة هي مجموعة من الاوامر مترتبة ومكتوبة بلغة سهل على الاله انها تفهمها وبعدها بيقوم الحاسب أو النظام الحاسوبي اللي عندك بتنفيذ الاوامر دي .

-       طب بس حاسب عندك .. يعني ايه النظام الحاسوبي؟ ..

ده يا سيدي يعني اي جهاز عندك بيحتوي على معالج صغير.

وخد عندك المثال ده .

الغسالة اللي انت بتغسل بيها الهدوم بتاعتك .. فيها حاسب آلي صغير!

-       طب ازاي؟

أقولك يا سيدي .. انت بتوجه الاوامر عن طريق الازرار والغسالة بتنفذها عن طريق المعالج الصغير اللي موجود فيها .. يعني من غير المعالج الصغير اللي هو بيترجم البرمجة مش هتشتغل الغسالة وهتفضل الهدوم مش نضيفة.

لو مش مصدق المثال ده .. في امثلة كتير اوي .. مش عايز اقولك اننا مش هنخلص بس ابسط حاجه التليفون اللي في ايدك ده كله على بعضه كده برمجه اما بتحب تفتح الواتساب كل اللي بتعمله انك بتضغط على رمز الواتساب وده بنسميه أمر بعدها حتة الحديدة اللي في ايدك ( التليفون) فهمت انك عايز تتكلم أما ترجمة الضغطة بتاعتك من خلال المعالج اللي موجود جواها وتتكلم براحتك.

يا ابن الناس صدقني من غير البرمجة كل حاجه حواليك عباره عن حتة حديدة ولا ليها اي لزمة.

 وطب وأنا لازم اتعلم برمجة ؟؟

من وجهة نظري التي ليس لها اي قيمة على الاطلاق .. براحتك !!!!!

في ناس بتقول ان البرمجة هتبقى عامله زي القراءة والكتابة يعني كل واحد لازم يتعلم برمجة وده معناه ان كل الناس هتكون مبرمجين وانا مش مع الرأي ده بصراحه .. ولكن ان يكون عندك علم بالشيء ده أفضل حل طبعا وأنك تكون فاهم ازاي كل حاجه بتحصل حواليك ده غير طبعا انك لو اتعلمت ووصلت للاحتراف والفوايد الكتيرة اللي ممكن توصل ليها لو بقيت مبرمج شاطر فخليك معايا نجاوب على باقي الاسئلة وانت تعرف انا عايز اوصلك لايه.

-       توصلني ل فين بس يا كبير .. طب إفرض مثلا مثلا يعني أني ما افهمش ف الكوميوطر؟

طب ساعتها لازم تلف وترجع تاني لان انت كده مكانك مش هنا .. انت مكانك فوق

-       يا كبير بقولك أفرض . طب هو يعني لو اتعلمت برمجة هلاقي بيها شغل ؟

تسمحلي أقولك ان المبرمجين من اول 10 وظايف مطلوبين على مستوى العالم كله وشركات كتيرة أوي بيدوروا عليهم زي جوجل وآبل ومايكروسوفت.

-       اهو كده الكلام يحلو .. كلامك كده بيقول أن البرمجة دي كويسه جدا ك مستقبل .. صح كده ؟

صح الصح كمان .. يعني مثلا بغض النظر عن انها مهمة في حياتنا الطبيعية وان داخله في كل المجالات بتاعتنا تقريبا ويقدر يستفيد منها كل المستويات الا انها تعتبر وسيلة مهمة جدا عشان نلاقي حلول كتيرة لمشاكل فعليه موجوده في حياتنا وانك تبتكر طرق جديدة غير الطرق التقليدية المعروفة .

وكمان بتساعد على تسريع عمليات الادخال والاخراج ف الاجهزة ؛ وبرده بتساعد على تجميع البيانات والمعلومات وانك تديرها بشكل صحيح وسليم وتقدر تحقق منها أقصى استفاده مطلوبة ؛ وماتنساش أن المقبلين على الدراسة او تدريس البرمجة الآلاف الجامعات العالمية دلوقت عشان يقدروا يخرجوا كوادر تقدر تغطي احتياجات سوق العمل.

وأحب أقولك كمان إن اعتمادنا ع التكنولوجيا بشكل عام واعتمادنا على تقنيات الذكاء الاصطناعي بشكل خاص ده بيزيد بشكل يومي وبقى شيء لابد منه في حياتنا عشان يحصل تقدم وكمان نحصل على الراحة والرفاهية.

ممكن برده تعمل بحث صغير كده على النت وتشوف كمية الوظايف اللي انقرضت دلوقتي بسبب احلال الاله محل الانسان او برنامج صغير ممكن يقوم بكل الوظايف اللي كان شخص ممكن يقوم بيها ومش بس كده ده في فعلا مهن بقت مهدده بالانقراض ومنها اللي بدأ يختفي فعليا واوضح مثال للكلام ده .. خد عندك .. الطباعة والنشر .. التطور التقني اللي حصل في المجال ده رهيب جدا .. ما بقاش حد يروح يشتري جرايد ورقية او مجلات وكل بقى يتجه للتصفح الاونلاين أو التليفزيون وغيره وحصل انخفاض في معدلات المبيعات وبالتالي كل الناس اللي كانت شغاله في كتابة المقالات والصحف وغيرها مابقاش عندهم عائد مادي يخليهم يستمروا ف المجال ده الا اذا كان عندهم القدرة على تطوير نفسهم وأنهم لازم يعاصروا التقدم اللي بيحصل حواليهم وانهم يتوجهوا للصحافة الالكترونية وغيرها.. ومش بس الناس اللي كانت بتكتب ؛ ده كمان المهن المرتبطه بالطباعه والفرز والنقل والتوزيع والمبيعات كل ده مابقاش موجود زي الاول لأن كل ده بقى بيتم بشكل أسرع وأدق.

اللي بيحصل دلوقت ان التكنولوجيا حطت قدام المهن كلها خيارين مالهمش تالت .. إما التطوير وأنك تواكب العصر اللي انت بتعيش فيه.. أو تتلاشى خالص وتكون حاجه من التراث .. وده بسبب أن الانظمة الجديدة والروبوتات اللي بدات تظهر هتحل محل المهن دي وهتقوم بعملها بتكلفة أقل وكفاءة اعلى.

وطبعا زي ما بيحصل تطوير في كل حاجه وفي مهن بتختفي من وسطنا .. برده في مهن كتير بدات تظهر .. والمهن دي بتعتمد بشكل أساسي على التطوير اللي بيحصل وعندك المثال بتاع الصحافة ..

الصحافة الالكترونية عملت لينا اعلانات الكترونية ودي محتاجه حد ينظمها ووظيفة مكناش نسمع عنها والاعلانات دي بتشتغل اوتوماتيك وبمجرد النقر عليها.

وبرده عندك برمجة هواتف الاندورويد ودول بسم الله ماشاء الله مفيش أكتر منهم ومديرين الامن الالكتروني ومطوري الانظمة الالكترونية .

خلاصة كلامي ..

ان لو عملنا رسم بياني يوضحلك اعتماد سوق العمل على البرمجة والذكاء الاصطناعي هتلاقي الخط ده عمال يزيد كل يوم .. وحتى لو في أخطاء ف الآلات والبرامج .. كل لحظة بيتم تطوير الحاجات دي والتطوير برده مواكب للتطور التكنولوجي اللي موجود حوالينا

وان تطوير الذكاء الاصطناعي يوم بعد يوم قتل حرفيا صناعات كتير مكنش حد يتوقع انها تختفي زي السيارات ذاتية القياده او توصيل الطلبات.

عشان كده لو عايز تفضل ف المكان اللي انت فيه دلوقت لازم تواكب كل اللي بيحصل حواليك